Vendime të miratuara në mbledhjen e Këshillit të Ministrave, datë 27 Janar 2023:
V E N D I M
PËR
BAZËN E TË DHËNAVE TË PLATFORMËS “ME TY PËR SHQIPËRINË QË DUAM”, RREGULLAT E DETAJUARA PËR SEKSIONET E SAJ, TË DHËNAT PARËSORE E DYTËSORE, DHËNËSIT E INFORMACIONIT, NDËRVEPRIMIN ME BAZAT E TJERA TË TË DHËNAVE, SISTEMET ELEKTRONIKE DHE PROTOKOLLET E INSTITUCIONEVE
Në mbështetje të nenit 100 të Kushtetutës, të neneve 16, pika 4, dhe 22, pikat 3 e 4, të ligjit nr.107/2021, “Për bashkëqeverisjen”, dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e Kryeministrit, Këshilli i Ministrave
V E N D O S I:
I. DISPOZITA TË PËRGJITSHME
1. Ky vendim ka si objekt përcaktimin e rregullave për:
a) funksionimin e bazës së të dhënave të platformës “Me ty për Shqipërinë që duam”, në vijim “Platforma”, seksioneve të saj, së bashku me elementet përkatëse, si: të dhënat parësore e dytësore, dhënësit e informacionit, si dhe për ndërveprimin me bazat e tjera të të dhënave;
b) procedurën dhe metodologjinë e ndërveprimit mes sistemeve elektronike dhe protokolleve të institucioneve për kalimin automatik në platformë të çështjeve të parashikuara në ligjin nr.107/2021, “Për bashkëqeverisjen”, në vijim “ligji”, si dhe për monitorimin e trajtimit të shkresave të subjekteve private, drejtuar institucioneve të administratës shtetërore.
2. Institucioni administrues i bazës së të dhënave të “Platformës” është Agjencia për Dialog dhe Bashkëqeverisje, në vijim “Agjencia”.
3. Baza e të dhënave të “Platformës” është e organizuar në pjesë, në vijim të quajtura seksione, të cilat pasqyrojnë seksionet e parashikuara në kreun VI të ligjit. Në rast të miratimit të seksioneve të reja të “Platformës” nga Këshilli i Ministrave, në përputhje me pikën 4, të nenit 16, të ligjit, ky ndryshim pasqyrohet në bazën e të dhënave.
4. Baza e të dhënave të “Platformës”, sipas seksioneve përkatëse, përmban të dhëna për ankesat dhe kërkesat e subjekteve dhe për ecurinë e përfundimin e shqyrtimit të tyre (ankesave/kërkesave). Këto të dhëna përftohen nga Agjencia gjatë zbatimit të procedurave të parashikuara në ligj dhe në aktet nënligjore në zbatim të tij.
5. Dhënës të informacionit janë subjektet ankuese dhe kërkuese në seksionet e “Platformës”, si dhe koordinatorët e punonjësit e Agjencisë për të dhënat, të cilat mblidhen dhe administrohen prej tyre përmes protokolleve elektronike ose shkresore të institucioneve qendrore dhe degëve territoriale të tyre.
II. SEKSIONET, TË DHËNAT PARËSORE, DYTËSORE, AKSESIMI DHE NDËRVERPIMI ME BAZAT E TJERA
1. Të dhëna parësore dhe dytësore të bazës së të dhënave, sipas seksioneve, janë, si më poshtë vijon:
a) Të dhënat parësore të seksioneve “Ankesa ime” dhe “Biznesi im”, ku përfshihen:
i. numri unik i ankesës/kërkesës;
ii. organi administrativ në adresë të të cilit drejtohet ankesa/kërkesa;
iii. natyra e ankesës/kërkesës, sipas kategorizimit të kryer nga ankuesi në “Platformë”, bazuar në shkronjat “a”, “b” ose/dhe “c”, të nenit 24, të ligjit;
iv. objekti konkret i ankesës/kërkesës dhe përshkrimi i saj sipas ankuesit/kërkuesit;
v. dokumentet bashkëlidhur saj, nëse ka të tilla;
vi. data e paraqitjes së ankesës/kërkesës;
vii. punonjësi ose koordinatori i Agjencisë, që ndjek trajtimin e kërkesës/ankesës;
viii. natyra e kërkesës/ankesës sipas vlerësimit të punonjësit ose koordinatorit të Agjencisë;
ix. struktura dhe nëpunësi përgjegjës për ndjekjen e çështjes pranë organit administrativ;
x. data e delegimit te struktura dhe nëpunësi përgjegjës i organit administrativ;
xi. etapa e trajtimit dhe afati përkatës;
xii. përgjigjja ose akti i nxjerrë nga organi administrativ, në përfundim të shqyrtimit;
xiii. koha e përfundimit të shqyrtimit;
xiv. njoftimi i Agjencisë drejtuar ankuesit dhe/ose kërkuesit për përfundimin e shqyrtimit, i nënshkruar elektronikisht nga koordinatori ose punonjësi që ka trajtuar çështjen, në rastin kur përgjigjja jepet përmes platformës, ose si skanim i shkresës në hard copy kur denoncimi ka ardhur në këtë formë (hard copy);
xv. shënime të koordinatorit ose punonjësit të Agjencisë për çështjen, nëse ka të tilla;
xvi. të dhëna të kontaktit: numri i telefonit dhe/ose adresa e e-mail-it të ankuesit/kërkuesit.
b) Të dhënat parësore të seksionit “Denonco korrupsionin”, ku përfshihen:
i. numri unik i denoncimit;
ii. organi administrativ i referuar në denoncim;
iii. nëpunësi/t e organit administrativ ndaj të cilëve drejtohet denoncimi;
iv. objekti konkret i denoncimit dhe përshkrimi i tij sipas denoncuesit;
v. dokumentet bashkëlidhur denoncimit, si fakte ose prova që vërtetojnë denoncimin:
vi. data e paraqitjes së denoncimit;
vii. koordinatori ose punonjësi i Agjencisë që ka administruar denoncimin;
viii. vlerësimi paraprak formal i koordinatorit ose punonjësit të Agjencisë;
ix. data e dërgimit të denoncimit pranë Koordinatorit Kombëtar kundër Korrupsionit;
x. njoftimi i Koordinatorit Kombëtar kundër Korrupsionit drejtuar Agjencisë për ecurinë e denoncimit dhe nivelin e informacionit që mund të publikohet për çështjen;
xi. njoftimi i Agjencisë drejtuar denoncuesit mbi ecurinë e denoncimit, i nënshkruar elektronikisht nga koordinatori ose punonjësi i Agjencisë, kur përgjigja jepet përmes platformës, ose si skanim i shkresës në hard copy kur denoncimi ka ardhur në këtë formë (hard copy);
xii. shënime të koordinatorit ose punonjësit të Agjencisë për çështjen, nëse ka të tilla;
xiii. të dhëna të kontaktit: numri i telefonit dhe/ose adresa e e-mail-it të ankuesit/kërkuesit.
c) Të dhënat parësore të seksioneve “Nisma ime” dhe “Fjala ime”, ku përfshihen:
i. numri unik i propozimit/opinionit;
ii. organi administrativ (ministria ose institucioni) që mbulon fushën për të cilën paraqitet propozimi/opinioni;
iii. objekti dhe përshkrimi i propozimit/opinionit;
iv. dokumentet bashkëlidhur tij, nëse ka të tilla;
v. data e paraqitjes së propozimit/opinionit;
vi. punonjësi ose koordinatori i Agjencisë, që ndjek çështjen;
vii. data e dërgimit tek organi administrativ kompetent;
viii. punonjësi, drejtoria ose titullari i institucionit që ndjek çështjen;
ix. përgjigjja e organit administrativ për përputhshmërinë me programin qeverisës, realizueshmërinë e propozimit dhe, nëse është rasti, hapat e ndërmarrë;
x. qëndrimi/vlerësimi i Agjencisë mbi çështjen;
xi. njoftimi i Agjencisë drejtuar propozuesit për përfundimin e shqyrtimit, rezultatet e tij dhe, nëse është rasti, hapat që do të ndërmerren për realizimin e tij, i nënshkruar elektronikisht nga koordinatori ose punonjësi i Agjencisë që ka trajtuar çështjen;
xii. shënime të punonjësit ose koordinatorit të Agjencisë për çështjen, nëse ka të tilla;
xiii. të dhëna të kontaktit: numri i telefonit dhe/ose adresa e e-mail-it të subjektit që ka paraqitur propozimin/opinionin.
ç) Të dhënat parësore të seksionit “Interpelanca ime”, ku përfshihen:
i. numri unik i kërkesës;
ii. organi administrativ (ministria ose institucioni) për të cilin është paraqitur kërkesa për “interpelancë”;
iii. përshkrimi i çështjes/problematikës sipas kërkuesve;
iv. dokumentet bashkëlidhur tij, nëse ka të tilla;
v. data e paraqitjes së kërkesës;
vi. punonjësi ose koordinatori i Agjencisë, që ndjek çështjen;
vii. data e dërgimit tek organi administrativ kompetent;
viii. përgjigjja e organit administrativ drejtuar Agjencisë për kalendarin e “interpelancës”;
ix. njoftimi i Agjencisë drejtuar kërkuesve për kalendarin e “interpelancës”;
x. data/t e “interpelancës”;
xi. shënime të koordinatorit ose punonjësit të Agjencisë për angazhimet e marra gjatë interpelancës;
xii. raportimet periodike të organit publik ndaj agjencisë për ecurinë e angazhimeve deri në realizimin përfundimtar të kërkesës;
xiii. njoftimet e Agjencisë ndaj kërkuesve për çështjen e nënshkruar elektronikisht nga koordinatori ose punonjësi i Agjencisë që ka trajtuar çështjen;
xiv. të dhëna të kontaktit: numri i telefonit dhe/ose adresa e e-mail-it të kërkuesit.
d) Të dhënat parësore të seksionit “Shkolla ime”, ku përfshihen:
i. numri unik i kërkesës;
ii. organi administrativ (ministria) për të cilin është paraqitur kërkesa ose projekti “Shkolla ime”;
iii. përshkrimi i çështjes/projektit sipas kërkuesve;
iv. dokumentet bashkëlidhur tij, nëse ka të tilla;
v. data e paraqitjes së kërkesës/projektit;
vi. koordinatori ose punonjësi i Agjencisë që ndjek çështjen;
vii. data e dërgimit tek organi administrativ kompetent;
viii. përgjigjja e organit administrativ drejtuar Agjencisë për kërkesën ose projektin “Shkolla ime”;
ix. njoftimi i Agjencisë drejtuar kërkuesve për hapat e ndërmarrë për kërkesën ose projektin “Shkolla ime”;
x. data/t e njoftimit për realizimin e kërkesës ose projektit “Shkolla ime”;
xi. shënime të punonjësit ose koordinatorit të Agjencisë për angazhimet e marra gjatë realizimit të projektit;
xii. raportimet periodike të ministrisë ndaj Agjencisë për ecurinë e angazhimeve deri në realizimin përfundimtar të kërkesës/projektit;
xiii. njoftimet e Agjencisë ndaj kërkuesve për çështjen e nënshkruar elektronikisht nga koordinatori ose punonjësi i Agjencisë që ka trajtuar çështjen;
xiv. të dhëna të kontaktit: numri i telefonit dhe/ose adresa e e-mail-it të kërkuesit.
dh) Të dhënat parësore të seksionit “Nota ime”, ku përfshihen:
dh/1) Të dhëna për shërbimet on-line, si:
i. emërtimi i shërbimit publik;
ii. organi administrativ që ofron shërbimin;
iii. data e ofrimit të shërbimit;
iv. “Nota” për vlerësimin e cilësisë së shërbimit të dhënë;
v. numri i vlerësimeve të marra për shërbimin gjatë muajit sipas kalendarit;
vi. koha e shpenzuar për shërbimin e ofruar dhe të vlerësuar;
vii. shënime, nëse ka, për cilësinë e shërbimit të ofruar;
viii. “Nota mesatare”, nisur nga mesatarja e vlerësimeve për muajin, e cila publikohet në mënyrë periodike;
ix. koeficienti për vlerësimin e institucionit publik që ka ofruar shërbimin;
x. të dhëna të kontaktit: numri i telefonit dhe/ose adresa e e-mail-it të qytetarit që paraqet notën për shërbimin.
dh/2) Të dhëna për shërbimet që nuk ofrohen on-line, si:
i. emërtimi i shërbimit publik;
ii. organi administrativ që ofron shërbimin;
iii. data e kërkesës/dhënies së shërbimit;
iv. “Nota” për cilësinë e shërbimit të ofruar në sportel;
v. koha e shpenzuar në sportel për shërbimin e ofruar;
vi. shënime, nëse ka, për cilësinë e shërbimit të ofruar;
vii. numri i vlerësimeve të marra për shërbimin gjatë muajit sipas kalendarit;
viii. “Nota mesatare”, nisur nga mesatarja e vlerësimeve për muajin, e cila publikohet në mënyrë periodike;
ix. koeficienti për vlerësimin e strukturave ofruese të shërbimeve të institucionit publik;
x. të dhëna të kontaktit: numri i telefonit dhe/ose adresa e e-mail-it të subjektit që paraqet notën për shërbimin.
e) Të dhënat parësore të seksionit “Dua të kontribuoj”, ku përfshihen:
i. numri unik i kërkesës për kontribut;
ii. organi administrativ (ministria ose institucioni) që mbulon fushën për të cilën paraqitet propozimi i kontributit/kërkesa;
iii. objekti dhe përshkrimi i kontributit/kërkesës;
iv. dokumentet bashkëlidhur tij, nëse ka të tilla;
v. data e paraqitjes së propozimit të kontributit/kërkesës;
vi. punonjësi ose koordinatori i Agjencisë, që ndjek çështjen;
vii. data e dërgimit tek organi administrativ kompetent;
viii. punonjësi, drejtoria ose titullari i institucionit që ndjek çështjen;
ix. përgjigjja e organit administrativ për rëndësinë e propozimit të kontributit të paraqitur dhe mundësitë për përfshirjen e tij në institucion dhe, nëse është rasti, hapat që do të ndërmerren deri në realizimin e tij;
x. qëndrimi/vlerësimi i Agjencisë për çështjen;
xi. njoftimi i Agjencisë drejtuar propozuesit për përfundimin e shqyrtimit të kërkesës për kontribut, rezultatet e tij dhe, nëse është rasti, hapat që do të ndërmerren për realizimin e tij, i nënshkruar elektronikisht nga koordinatori ose punonjësi i Agjencisë që ka trajtuar çështjen;
xii. shënime të koordinatorit ose punonjësit të Agjencisë për çështjen, nëse ka të tilla;
xiii. të dhëna të kontaktit: numri i telefonit dhe/ose adresa e e-mail-it të kërkuesit.
ë) Të dhënat parësore të seksionit “Kuvendimi ynë”, ku përfshihen:
i. organi administrativ (ministria ose institucioni) që mbulon fushën për të cilën paraqitet propozimi/opinioni;
ii. përshkrimi i propozimit/opinionit;
iii. data e paraqitjes së propozimit/opinionit;
iv. punonjësi ose koordinatori i Agjencisë, që ndjek, grumbullon e trajton opinionet dhe i grupon ato si rekomandime;
v. vlerësimi i Agjencisë për propozimet e marra;
vi. data e dërgimit të grupopinioneve/rekomandimeve tek organi administrativ kompetent;
vii. punonjësi, titullari ose drejtoria e institucionit që ndjek çështjen;
viii. përgjigjja e organit administrativ për rekomandimet e paraqitura dhe masa e realizueshmërisë së tyre;
ix. njoftimi/publikimi i Agjencisë për rekomandimet/grupopinionet e dala si rezultat i temës së propozuar për kuvendim;
x. të dhëna të kontaktit: numri i telefonit dhe/ose adresa e e-mail-it të propozuesit.
f) Të dhënat dytësore të bazës së të dhënave, ku përfshihen:
f/1) Të dhënat dytësore për individin (qytetarin), si:
i. numri personal i identifikimit (ID) i subjektit që përdor “Platformën, në cilësinë e kërkuesit, ankuesit, denoncuesit, apo cilësimi tjetër i tij sipas qëllimit të secilit seksion të Platformës”;
ii. gjenealitetet e tij, në rastin e qytetarëve;
iii. adresa/të dhënat e vendbanimit brenda dhe jashtë vendit;
iv. gjinia e personit;
v. faktin e të qenit përfaqësues i një komuniteti, nëse ai është është identifikuar si i tillë.
f/2) Të dhënat dytësore për personin juridik privat, shoqëri tregtare (biznesin), si:
i. emri tregtar i regjistruar në QKB;
ii. NUIS-i / NIPT-i;
iii. emri i administratorit;
iv. forma juridike (PF, SHPK, SHA);
v. adresa/të dhënat e vendbanimit brenda dhe jashtë vendit.
2. Baza e të dhënave të “Platformës” ndërvepron me:
a) Regjistrin Kombëtar të Gjendjes Civile, administruar nga institucioni përgjegjës, i përcaktuar sipas parashikimeve të ligjit nr.10129, datë 11.5.2009, “Për gjendjen civile”, për të dhënat që lidhen me gjenealitetet dhe numrin personal të identifikimit të individit që përdor “Platformën” (në cilësinë e kërkuesit, ankuesit, denoncuesit e të tjera, sipas qëllimit të secilit seksion të “Platformës”);
b) Regjistrin Tregtar, administruar nga Qendra Kombëtare e Biznesit, për të dhënat që lidhen me emrin dhe numrin NUIS të subjekteve tregtare që përdorin “Platformën” (në cilësinë e kërkuesit, ankuesit, denoncuesit e të tjerat, sipas qëllimit të secilit seksion të “Platformës”);
c) Regjistrin Kombëtar të Adresave, të administruar nga institucioni përgjegjës, i përcaktuar sipas parashikimeve të ligjit nr.9270, datë 29.7.2004, “Për sistemin e adresave”, i ndryshuar, për të dhënat që lidhen me adresën ose vendbanimin e subjekteve që përdorin “Platformën” (në cilësinë e kërkuesit, ankuesit, denoncuesit apo në cilësimin tjetër të tij, sipas qëllimit të secilit seksion të “Platformës”).
3. Nivelet e aksesimit në bazën e të dhënave të “Platformës” janë:
a) Agjencia ka akses të plotë dhe të pakufizuar në informacionin që prodhohet, regjistrohet dhe administrohet në bazën e të dhënave, në rolet:
i. lexues;
ii. përdorues;
iii. administrator;
iv. auditues;
v. prodhues i statistikave.
b) Individët dhe të gjitha subjektet, që aksesojnë “Platformën” në cilësinë e kërkuesit, ankuesit, denoncuesit apo cilësimi tjetër të tyre, sipas qëllimit të secilit seksion të “Platformës”, kanë vetëm nivelin e aksesimit “përdorues”.
c) Përfaqësuesit e institucioneve kanë vetëm nivelin e aksesimit “lexues” dhe vetëm për çështjet që lidhen me ankesat/kërkesat drejtuar tyre.
Çdo veprim në bazën e të dhënave të Platformës lidhur me aksesin, ndryshimin, korrigjimin, përhapjen e të dhënave duhet të lërë gjurmë, me qëllim garantimin e sigurisë dhe konfidencialitetit.
III. PROCEDURA DHE METODOLOGJIA E NDËRVEPRIMIT MES SISTEMEVE ELEKTRONIKE DHE PROTOKOLLEVE TË INSTITUCIONEVE
1. Në përputhje me pikat 3 dhe 4, të nenit 22, të ligjit, ndërveprimi i sistemeve elektronike dhe protokolleve të institucioneve me “Platformën” kryhet për:
a) kalimin automatik në platformë të çështjeve të parashikuara në ligj;
b) monitorimin e trajtimit të shkresave, kërkesave dhe ankesave të subjekteve private drejtuar institucioneve të administratës shtetërore.
2. Në funksion të kalimit automatik të çështjeve në të gjitha faqet on-line të institucioneve shtetërore të administratës shtetërore, rubrikat e ankesave mbi veprimtarinë e institucionit lidhen drejtpërdrejt me “Platformën”, në mënyrë që ankesa të përcillet në të.
3. Në të gjitha institucionet shtetërore, ku trajtimi i shkresave të qytetarëve dhe biznesit kryhet nëpërmjet sistemeve/protokolleve elektronike, koordinatorët dhe punonjësit e Agjencisë kanë akses të drejtpërdrejtë në këto sisteme/protokolle, si dhe në dokumentacionin fizik për verifikimin e përputhshmërisë së tij me informacionin e ngarkuar në sistem.
4. Në rastin e institucioneve qendrore, të cilat përdorin protokollin elektronik EDRMS (Electronic Document Record Management System), ankesat/kërkesat e qytetarëve dhe subjekteve kalojnë në mënyrë automatike në “Platformën” e bashkëqeverisjes për trajtim të mëtejshëm, sipas parashikimeve të ligjit.
5. Për rastet e ankesave/kërkesave të paraqitura në mënyrë shkresore nga subjektet, pranë institucioneve qendrore caktohet një punonjës për hedhjen brenda 24 (njëzet e katër) orëve nga administrimi tyre në “Platformën” e bashkëqeverisjes.
6. Në rast se pranë institucioneve qendrore paraqiten ankesa/kërkesa, shqyrtimi i të cilave, pavarësisht adresimit të kryer nga ankuesi, janë në kompetencë të Agjencisë, në përputhje me ligjin nr.17/2021, ato i përcillen në rrugë zyrtare kësaj të fundit për ndjekje dhe kompetencë.
7. Në përputhje me përcaktimet e neneve 21, pika 4, dhe 35, pika 5, shkronja “a”, të ligjit, në platformë nuk trajtohen ankesa ose denoncime anonime.
8. Denoncimet e ardhura në rrugë shkresore, që i drejtohen Rrjetit të Koordinatorëve kundër Korrupsionit, nuk trajtohen nga Agjencia, por i përcillen për ndjekje dhe kompetencë strukturës përkatëse pranë Ministrisë së Drejtësisë.
9. Në kuptim të shkronjës “c”, të pikës 4, të kreut II, të këtij vendimi, akses në rolin e lexuesit në ankesat dhe kërkesat e ardhura nga protokolli shkresor i institucionit, të regjistruara në “Platformën” e bashkëqeverisjes, përveç punonjësve të ngarkuar me ndjekjen e tyre, kanë dhe titullari i institucionit, drejtori i kabinetit dhe sekretari i përgjithshëm.
IV. DISPOZITA TË FUNDIT
1. Agjencia, në bashkëpunim me AKSHI-n, bashkërendojnë punën për zhvillimet teknike të nevojshme, që të mundësohen funksionimi i bazës së të dhënave dhe ndërveprimi i sistemeve, sipas përcaktimeve të këtij vendimi.
2. Agjencia për Dialog dhe Bashkëqeverisje ndërvepron dhe bashkëpunon me Agjencinë e Ofrimit të Shërbimeve Publike të Integruara (ADISA) për ndjekjen e ecurisë së trajtimit të ankesave dhe kërkesave të administruara nga Agjencia përmes “Platformës” së bashkëqeverisjes www.shqipëriaqeduam.al si dhe monitorimin e shërbimeve on-line sipas përcaktimeve në ligjin nr.107/2021, “Për bashkëqeverisjen”, dhe në aktet nënligjore në zbatim të tij.
3. Ngarkohen Agjencia për Dialog dhe Bashkëqeverisje, Agjencia Kombëtare e Shoqërisë së Informacionit dhe institucionet që ndërveprojnë në “Platformën” e bashkëqeverisjes për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E BUXHETIT PËR DREJTORINË E PËRGJITHSHME TË PRONËSISË INDUSTRIALE, PËR VITIN 2023
Në mbështetje të nenit 100 të Kushtetutës dhe të pikës 5, të nenit 189/c, të ligjit nr.9947, datë 7.7.2008, “Për pronësinë industriale”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Miratimin e buxhetit të Drejtorisë së Përgjithshme të Pronësisë Industriale, për vitin 2023, sipas tabelës nr.1, që i bashkëlidhet këtij vendimi dhe është pjesë përbërëse e tij.
2. Ngarkohet Drejtoria e Përgjithshme e Pronësisë Industriale për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
KRIJIMIN, ORGANIZIMIN DHE FUNKSIONIMIN E SPITALEVE RAJONALE, TERCIARE DHE QENDRAVE SPITALORE RAJONALE PUBLIKE
Në mbështetje të nenit 100 të Kushtetutës dhe të pikës 3, të nenit 14, të ligjit nr.55/2022, “Për shërbimin spitalor në Republikën e Shqipërisë”, me propozimin e ministrit të Shëndetësisë dhe Mbrojtjes Sociale, Këshilli i Ministrave
V E N D O S I:
1. Spitalet rajonale terciare dhe qendrat spitalore rajonale krijohen, organizohen dhe funksionojnë sipas përcaktimeve të bëra në ligjin nr.55/2022, “Për shërbimin spitalor në Republikën e Shqipërisë”, dhe në këtë vendim. Hapja e spitaleve, rast pas rasti, bazuar në parashikimet e planit spitalor kombëtar bëhet nga ministri përgjegjës për shëndetësinë.
2. Spitali rajonal, qendra spitalore rajonale dhe spitali terciar e ushtrojnë veprimtarinë e tyre, në përputhje me standardet, protokollet e shërbimeve për trajtimin spitalor dhe udhërrëfyesve, të miratuara nga ministria përgjegjëse për shëndetësinë.
3. Spitali rajonal është institucioni i kujdesit shëndetësor me shtretër, i përgjithshëm ose i specializuar, që ofron kujdes shëndetësor ndaj popullatës së një qarku të caktuar sipas sistemit të referimit.
4. Qendra Spitalore Rajonale krijohet kur një spital i përgjithshëm, terciar apo rajonal, administron një ose më shumë spitale të përgjithshme dhe/ose të specializuara dhe/ose ditore, në nivel bashkie ose qarku, me qëllim optimizimin e menaxhimit të burimeve financiare, njerëzore dhe ato kapitale, për ofrimin e një shërbimi spitalor cilësor dhe të aksesueshëm afër vendbanimit.
5. Qendra Spitalore Rajonale menaxhon dhe administron burimet financiare dhe njerëzore, në bazë të nevojave për shërbim spitalor të popullatës që ajo mbulon, sipas udhëzimit të miratuar nga ministri përgjegjës për shëndetësinë.
6. Spitali terciar është ai spital i cili ofron shërbim mjekësor terciar, procedura diagnostike, terapeutike, konsulta të specializuara për diagnostikim e trajtim mjekësor me pajisje biomjekësore të teknologjisë së lartë.
7. Spitali mund të ofrojë shërbime të nivelit terciar për një ose më shumë specialitete që përbëjnë një njësi funksionale, të organizuar dhe të aftë për të shërbyer si qendër reference për rajonin përkatës vetëm për këtë shërbim terciar, bazuar në organizimin territorial dhe sistemin e referimit.
8. Bordi drejtues kryesohet nga përfaqësuesi i ministrisë përgjegjëse për shëndetësinë dhe ka në përbërje:
a) një përfaqësues të Operatorit të Shërbimeve të Kujdesit Shëndetësor;
b) një përfaqësues të Fondit të Sigurimit të Detyrueshëm të Kujdesit Shëndetësor;
c) një përfaqësues nga Shoqatat e Pacientëve;
ç) një përfaqësues nga Komisioni Mjekësor.
9. Përgjegjësitë e veçanta të Bordit përcaktohen në rregulloren e spitalit.
10. Funksionet e bordit drejtues janë:
a) Mbikëqyr dhe kontrollon drejtimin e veprimtarisë së spitalit;
b) Miraton rregulloren e brendshme, rregulloret ekonomike, financiare, të auditimit dhe të kontrollit, me propozimin e drejtorit të përgjithshëm të spitalit, sipas rregullores tip, të miratuar nga ministria përgjegjëse për shëndetësinë;
c) Miraton çdo vit raportin vjetor, bilancin, buxhetin vjetor;
ç) Miraton përdorimin e të ardhurave dytësore të spitalit, sipas prioriteteve të tij;
d) I propozon për miratim ministrit përgjegjës për shëndetësinë strukturën organizative të spitalit;
dh) Miraton indikatorët e performancës së personelit shëndetësor dhe normat e aktivitetit të shërbimit spitalor;
e) Miraton kontratën tip të punës për personelin shëndetësor të spitalit, me propozimin e drejtorit të përgjithshëm të spitalit;
ë) Harton dhe miraton rregulloren e funksionimit të Bordit;
f) Kontrollon zbatimin e normave dhe aktivitetit mjekësor, të përcaktuara nga ministria përgjegjëse për shëndetësinë lidhur me shërbimet përkatëse klinike.
11. Drejtori i përgjithshëm emërohet dhe shkarkohet nga ministri përgjegjës për shëndetësinë, sipas legjislacionit në fuqi.
12. Detyrat e drejtorit të përgjithshëm përcaktohen në rregulloren e funksionimit të veprimtarisë së spitalit.
13. Komisioni Mjekësor është një ndër organet drejtuese të spitalit rajonal, qendrës spitalore rajonale dhe spitalit terciar.
14. Komisioni Mjekësor për Qendrën Spitalore Rajonale përbëhet nga drejtuesit e spitaleve të cilat janë pjesë e Qendrës Spitalore Rajonale dhe drejtuesit e shërbimeve ose përfaqësues të zgjedhur nga vetë shërbimet e këtyre spitaleve.
15. Komisioni Mjekësor për spitalet rajonale dhe terciare përbëhet nga drejtuesit e shërbimeve ose përfaqësues të zgjedhur nga vetë shërbimet e këtyre spitaleve.
16. Funksionet dhe detyrat e Komisionit Mjekësor përcaktohen në rregulloren e spitalit.
17. Financimi i spitaleve bëhet në bazë të legjislacionit në fuqi dhe nga tarifat për shërbime klinike dhe joklinike për pacientë jashtë sistemit të referimit. Tarifat për shërbime klinike dhe joklinike jashtë sistemit të referimit përcaktohen në mekanizmin e sistemit të referimit.
18. Spitalet rajonale terciare dhe Qendra Spitalore Rajonale, për financimin e shërbimeve shëndetësore dhe aktivitetit, lidhin kontratë me Fondin e Sigurimit të Detyrueshëm të Kujdesit Shëndetësor.
19. Spitali zbaton sistemin e referimit, të miratuar nga ministri përgjegjës për shëndetësinë.
20. Fondi i Sigurimit të Detyrueshëm të Kujdesit Shëndetësor dhe Operatori i Shërbimeve të Kujdesit Shëndetësor auditojnë, kontrollojnë dhe monitorojnë, sipas fushave të tyre të përgjegjësisë, zbatimin e sistemit të referimit, menaxhimin e buxhetit, vlerësimin e aktivitetit vjetor të spitaleve dhe performancën e spitaleve sipas treguesve të aktivitetit spitalor, sipas kushteve të përcaktuara në kontratën e financimit.
21. Ngarkohen Ministria e Shëndetësisë dhe Mbrojtjes Sociale, Fondi i Sigurimit të Detyrueshëm të Kujdesit Shëndetësor, Operatori i Shërbimit të Kujdesit Shëndetësor dhe drejtoritë e spitaleve për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E KUADRIT MAKROEKONOMIK E FISKAL PËR PERIUDHËN 2024 – 2026
Në mbështetje të nenit 100 të Kushtetutës dhe të neneve 23 e 27, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Miratimin e kuadrit makroekonomik e fiskal për periudhën 2024 – 2026, “Treguesit kryesorë makroekonomikë”, lidhja nr.1, dhe “Treguesit fiskalë sipas buxhetit të konsoliduar”, lidhjet nr.2/1 e nr.2/2, që i bashkëlidhen këtij vendimi dhe janë pjesë përbërëse të tij.
2. Ngarkohet Ministria e Financave dhe Ekonomisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES SË BASHKËPUNIMIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË MBRETËRISË SË ARABISË SAUDITE, PËR LUFTËN KUNDËR KRIMIT
Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Brendshëm, Këshilli i Ministrave
V E N D O S I:
Miratimin, në parim, të marrëveshjes së bashkëpunimit, ndërmjet Këshillit të Ministrave të Republikës së Shqipërisë dhe qeverisë së Mbretërisë së Arabisë Saudite, për luftën kundër krimit, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN, NË PARIM, TË MARRËVESHJES NDRYSHUESE TË MARRËVESHJES PËR NJË HUA SHTESË, NDËRMJET REPUBLIKËS SË SHQIPËRISË DHE FONDIT TË KUVAJTIT PËR ZHVILLIMIN EKONOMIK ARAB, PËR FINANCIMIN E PROJEKTIT TË REHABILITIMIT TË RRUGËS SË LUMIT TË VLORËS, RATIFIKUAR ME LIGJIN NR.47/2020
Në mbështetje të nenit 100 të Kushtetutës dhe të neneve 10 e 23, të ligjit nr.43/2016, datë 21.4.2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave
V E N D O S I:
Miratimin, në parim, të marrëveshjes ndryshuese të marrëveshjes për një hua shtesë, ndërmjet Republikës së Shqipërisë dhe Fondit të Kuvajtit për Zhvillimin Ekonomik Arab, për financimin e projektit të rehabilitimit të rrugës së lumit të Vlorës, ratifikuar me ligjin nr.47/2020, sipas tekstit që i bashkëlidhet këtij vendimi.
Ky vendim hyn në fuqi menjëherë.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E MARRËVESHJES PËR NJOHJEN E KUALIFIKIMEVE PROFESIONALE TË MJEKËVE, STOMATOLOGËVE DHE ARKITEKTËVE NË KONTEKSTIN E MARRËVESHJES SË TREGTISË SË LIRË TË EVROPËS QENDRORE
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Arsimit dhe Sportit, Këshilli i Ministrave
V E N D O S I:
Miratimin e marrëveshjes për njohjen e kualifikimeve profesionale të mjekëve, stomatologëve dhe arkitektëve në kontekstin e Marrëveshjes së Tregtisë së Lirë të Evropës Qendrore, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
MIRATIMIN E MARRËVESHJES SË FINANCIMIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË (PËRFITUESI) DHE AGJENCISË FRANCEZE PËR ZHVILLIM (AGJENCIA), PËR FINANCIMIN E PROJEKTIT “FURNIZIMI ME UJË I QYTETIT TË DURRËSIT”
Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë, Këshilli i Ministrave
V E N D O S I:
Miratimin e marrëveshjes së financimit, ndërmjet Këshillit të Ministrave të Republikës së Shqipërisë (përfituesi) dhe Agjencisë Franceze për Zhvillim (Agjencia), për financimin e projektit “Furnizimi me ujë i qytetit të Durrësit” me një grant, në shumën 1 000 000 (një milion) euro, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
PËRCAKTIMIN E PROCEDURAVE TË HOLLËSISHME TË PËRDITËSIMIT TË LISTAVE TË PRONAVE SHTETËRORE DHE RREGULLAVE PËR BASHKËPUNIMIN NDËRMJET INSTITUCIONEVE
Në mbështetje të nenit 100 të Kushtetutës dhe të pikës 3, të nenit 39, të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”, me propozimin e Kryeministrit, Këshilli i Ministrave
V E N D O S I:
I. DISPOZITA TË PËRGJITHSHME
1. Ky vendim ka për qëllim:
a) përcaktimin e procedurave të përditësimit të plotë apo të pjesshëm të pronave të paluajtshme shtetërore, të inventarizuara ose jo, në pronësi ose përdorim apo përgjegjësi administrimi të institucioneve qendrore dhe njësive të vetëqeverisjes vendore;
b) përcaktimin e rregullave të bashkërendimit të veprimtarisë midis institucioneve shtetërore apo njësive të vetëqeverisjes vendore dhe Agjencisë Shtetërore të Kadastrës, gjatë procesit të përditësimit.
2. Në këtë vendim, termat e mëposhtëm kanë këtë kuptim:
a) “Përditësim”, procesi i saktësimit të listës dhe/ose të dhënave të pronës së inventarizuar apo që do të inventarizohet, sipas gjendjes reale nga konstatimi në terren dhe gjendjes juridike në raport me titujt e pronësisë private, të lëshuar sipas legjislacionit në fuqi;
b) “Përditësim i plotë”, procesi që kryhet për të gjitha pronat e inventarizuara apo të transferuara në favor të institucioneve shtetërore/njësive të vetëqeverisjes vendore;
c) “Përditësim i pjesshëm”, procesi i rishikimit për një ose më shumë prona të listës së inventarit të pronave shtetërore të miratuara për institucionet qendrore dhe/ose të transferuara në pronësi ose në përdorim të njësive të vetëqeverisjes vendore, përpara hyrjes në fuqi të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”;
ç) “Strukturë e posaçme”, struktura e cila ka për objekt të veprimtarisë
së saj inventarizimin, plotësimin, përditësimin dhe ndjekjen e procesit deri në regjistrimin e pronave në regjistrin kadastral publik të pasurive të
paluajtshme dhe pajisjen me certifikatë pronësie, për çdo pasuri;
d) “Subjekt i interesuar”, subjekti që përmbush kushtet e përcaktuara
në shkronjën “c”, të pikës 1, të nenit 39, të ligjit nr.20/2020, “Për
përfundimin e proceseve kalimtare të pronësisë në Republikën e Shqipërisë”;
dh) “Formular i përditësimit të pronës”, dokumenti në të cilin
pasqyrohen të dhënat e pronave që do të përditësohen, elemente të të cilit
janë të dhënat kadastrale të pronës, funksioni për të cilën përdoret prona,
enti me përgjegjësi administrative, enti përdorues i pronës, fakti i
inventarizimit apo jo me vendim të Këshillit të Ministrave, si dhe çdo
specifikim tjetër i nevojshëm që ndodhet në ASHK.
3. Pronat që inventarizohen dhe transferohen rishtazi, në çdo rast, i nënshtrohen përditësimit sipas rregullave dhe procedurave të parashikuara në këtë vendim.
II. PROCEDURAT E HOLLËSISHME, DOKUMENTACIONI I PËRDITËSIMIT DHE RREGULLAT PËR BASHKËPUNIMIN NDËRMJET INSTITUCIONEVE
1. Procedurat e përditësimit të listës ose të dhënave të pronës shtetërore të inventarizuar kryhen kur konstatohet se:
a) për një pronë apo një pjesë të saj ekziston titull pronësie i të tretëve, i miratuar sipas legjislacionit të posaçëm;
b) gjatë inventarizimit nuk janë pasqyruar të drejtat reale të të tretëve, që rëndojnë mbi pronën;
c) gjendja reale (faktike) e pronës, ku përfshihen sipërfaqja, pozicioni, konfigurimi dhe karakteristikat e tjera fizike, nuk përputhet me dokumentacionin e inventarizimit;
ç) prona e inventarizuar është objekt i proceseve kalimtare të pronësisë, sipas ligjit nr.20/2020, “Për përfundimin e proceseve kalimtare të pronësisë, në
Republikën e Shqipërisë”.
2. Në rastet kur përditësimi kryhet kryesisht nga ASHK-ja gjatë procedurave të regjistrimit fillestar ose përmirësimit apo përditësimit të regjistrimit të pasurive të paluajtshme të zonës kadastrale, në përfundim të këtij procesi njoftohet institucioni qendror shtetëror apo njësia e vetëqeverisjes vendore për të dhënat e përditësuara në regjistrin kadastral. Me marrjen e njoftimit nga ana e këtyre institucioneve vijohet me përditësimin e listës shtetërore sipas këtyre të dhënave.
3. Institucioni shtetëror qendror/njësia e vetëqeverisjes vendore për kryerjen e procedurës së përditësimit vepron, si më poshtë vijon:
a) Struktura e posaçme pranë institucionit qendror apo njësisë së vetëqeverisjes vendore, me asistencën apo pjesëmarrjen e Agjencisë Shtetërore të Kadastrës, identifikon listën/pronën që do t’i nënshtrohet përditësimit dhe grumbullon dokumentacionin tekniko-ligjor, arkivor, që disponon për të.
b) Kryen evidentimin faktik në terren të pronës, për rastin e parashikuar në shkronjën “c”, të pikës 1, të kreut II, të këtij vendimi.
c) Administron nga ASHK-ja informacion për gjendjen juridike të pronës, në përputhje me ligjin nr.111/2018, “Për kadastrën”, dhe vendimin nr.389, datë 13.5.2020, të Këshillit të Ministrave, “Për miratimin e listës dhe të tarifave të shërbimeve kadastrale”, i ndryshuar, përfshirë dhe informacionin për proceset kalimtare të pronësisë, në përputhje me parashikimet e ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”, dhe harton relacionin përkatës.
ç) Harton planin e rilevimit të pronës sipas modelit dhe në përputhje me
standardet teknike të përcaktuara në vendimin nr.782, datë 7.10.2020,
të Këshillit të Ministrave, “Për miratimin e modeleve të akteve
kadastrale dhe të dhënave në përmbajtje të hartës kadastrale”.
d) Harton listën e përditësuar të pronës/pronave, ku janë saktësuar emërtesa,
vendndodhja, komponentët dhe destinacioni i përdorimit.
dh) Paraqet për shqyrtim pranë ASHK-së listën e pronave shtetërore të
përditësuar, në mënyrë që të procedohet me hartimin e projektvendimit
për miratimin e listës përfundimtare të pronave shtetërore nga
Këshilli i Ministrave. Lista që paraqitet për shqyrtim shoqërohet nga
relacioni i gjendjes juridike dhe plani i rilevimit.
Për pronat që përditësohen nga njësitë e vetëqeverisjes vendore, lista e
pronave, së bashku me relacionin dhe planin e rilevimit i nënshtrohet vendimmarrjes nga këshilli bashkiak dhe verifikimit të ligjshmërisë nga prefekti, përpara se të përcillet për shqyrtim pranë ASHK-së.
4. ASHK-ja, pas shqyrtimit të dokumentacionit tekniko-ligjor, harton projektvendimin për miratimin e listës përfundimtare të pronave shtetërore nga Këshilli i Ministrave. Kur konstatohet mospërputhje e dokumentacionit me kriteret e parashikuara në nenin 36, të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”, ASHK-ja njofton institucionin administrues ose njësinë e vetëqeverisjes vendore për të kryer ndryshimet e nevojshme.
5. Lista e pronave shtetërore që përditësohen shoqërohet nga dokumentacioni i mëposhtëm:
a) Formulari i përditësimit të pronës/pronave, sipas modelit që i bashkëlidhet këtij vendimi dhe është pjesë përbërëse e tij;
b) Plani i rilevimit të pronës/pronave që përditësohet/n;
c) Informacioni për gjendjen juridike (kartelat kadastrale) të pasurisë/pasurive të paluajtshme që preket/n nga përditësimi, jo më të hershëm se 30 (tridhjetë) ditë.
Për pronat e njësive të vetëqeverisjes vendore krahas dokumentacionit të sipërpërmendur, lista shoqërohet edhe nga vendimi i këshillit bashkiak që miraton përditësimin.
6. Për pronat e paluajtshme shtetërore, që figurojnë në administrim të institucioneve qendrore apo në përdorim/pronësi të njësive të vetëqeverisjes vendore, të regjistruara apo jo në regjistrat kadastralë, por ekziston titull pronësie ndaj të tretëve, i krijuar sipas legjislacionit të posaçëm, veprohet, si më poshtë vijon:
a) Procedurat për përditësimin e listës së pronave shtetërore nisin kryesisht nga institucioni administrues, njësia e vetëqeverisjes vendore, ASHK-ja apo me kërkesë të subjektit të interesuar, atëherë kur konstatohet se titulli i pronësisë private shtrihet tërësisht apo pjesërisht mbi pronë shtetërore.
b) ASHK-ja, pas verifikimit të dokumentacionit të pronësisë, pozicionimit gjeografik të sipërfaqes në favor të subjektit të interesuar, në rastin kur prona shtrihet mbi pasuri në përgjegjësi administrimi të një institucioni qendror, njofton këtë të fundit për fillimin e procedurave të përditësimit të listës së inventarit dhe zbritjen e sipërfaqes së pasurisë për të cilën ekziston titulli i pronësisë private. Dokumentacioni tekniko-ligjor plotësohet sipas përcaktimeve të këtij kreu. Propozimi për heqjen e përgjegjësisë së administrimit miratohet sipas procedurave të legjislacionit në fuqi për pronat e paluajtshme të shtetit.
c) ASHK-ja, pas verifikimit të dokumentacionit të pronësisë, pozicionimit gjeografik të sipërfaqes në favor të subjektit të interesuar, në rastin kur prona shtrihet mbi pasuri në përdorim/pronësi të njësisë së vetëqeverisjes vendore, njofton këtë të fundit për fillimin e procedurave për përditësimin e listës së inventarit të pronave të paluajtshme shtetërore të transferuara në njësitë e vetëqeverisjes vendore. Dokumentacioni tekniko-ligjor plotësohet sipas përcaktimeve të këtij kreu. Propozimi për revokimin e transferimit të pronësisë bëhet në përputhje me parashikimet e nenit 8/a, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, i ndryshuar.
7. Institucionet qendrore dhe njësitë e vetëqeverisjes vendore, në përputhje me nenin 44, të ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”, krijojnë strukturat e posaçme të bashkëpunimit me drejtorinë përkatëse të ASHK-së, të cilat rakordojnë ndërmjet tyre, me qëllim realizimin e procedurave të parashikuara nga neni 37, i ligjit nr.20/2020, “Për përfundimin e proceseve kalimtare të pronësisë në Republikën e Shqipërisë”. Të dhënat e personave përgjegjës pranë strukturave të institucioneve qendrore dhe atyre të njësive të vetëqeverisjes vendore i njoftohen Drejtorisë së Përgjithshme të ASHK-së.
8. Të gjitha pronat e miratuara, të përditësuara në favor të institucioneve qendrore ose njësive të vetëqeverisjes vendore, regjistrohen në regjistrin e pasurive të paluajtshme, sipas vendimit të Këshillit të Ministrave për miratimin e listës së pronave shtetërore, në përputhje me nenin 24, të ligjit nr.111/2018, “Për Kadastrën”.
III. DISPOZITA TË FUNDIT
Ngarkohen Agjencia Shtetërore e Kadastrës, institucionet qendrore shtetërore dhe njësitë e vetëqeverisjes vendore për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA PROJEKTI “ZGJERIMI I VARREZAVE PUBLIKE KUÇOVË”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, që preken nga projekti “Zgjerimi i varrezave publike Kuçovë”.
2. Shpronësimi bëhet në favor të Bashkisë Kuçovë.
3. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse, që paraqitet në tabelën që i bashkëlidhet këtij vendimi, për pasuritë e llojit “arë” dhe “drufrutorë”, me një vlerë të përgjithshme prej 2 374 693 (dy milionë e treqind e shtatëdhjetë e katër mijë e gjashtëqind e nëntëdhjetë e tre) lekësh.
4. Vlera e përgjithshme e shpronësimit, prej 2 374 693 (dy milionë e treqind e shtatëdhjetë e katër mijë e gjashtëqind e nëntëdhjetë e tre) lekësh, përballohet nga Bashkia Kuçovë.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga Bashkia Kuçovë.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurive të paluajtshme, pronë private, të pasqyruar në tabelën që i bashkëlidhet këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Bashkisë Kuçovë.
8. Bashkia Kuçovë kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara nga Bashkia Kuçovë.
10. Agjencia Shtetërore e Kadastrës pezullon të gjitha transaksionet me pasuritë e shpronësuara, deri në momentin e realizimit të procesit të hedhjes së gjurmës së projektit mbi hartën kadastrale dhe regjistrimit të aktit të kalimit të pronësisë në favor të Bashkisë Kuçovë për pasuritë e shpronësuara.
11. Agjencia Shtetërore e Kadastrës, Drejtoria Vendore Kuçovë, brenda 30 (tridhjetë) ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë për pasuritë e shpronësuara në favor të Bashkisë Kuçovë.
12. Ngarkohen Ministria e Infrastrukturës dhe Energjisë, Bashkia Kuçovë, Agjencia Shtetërore e Kadastrës, Drejtoria Vendore Kuçovë, Agjencia Shtetërore për Shpronësimin dhe Drejtoria e Administrimit dhe Mbrojtjes së Tokës pranë Këshillit të Qarkut Berat për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
DISA SHTESA NË VENDIMIN NR.330, DATË 22.4.2020, TË KËSHILLIT TË MINISTRAVE, “PËR KRIJIMIN E BAZËS TË TË DHËNAVE SHTETËRORE “SISTEMI I DEKLARIMIT TË PASURISË DHE KONFLIKTIT TË INTERESIT – EACIDS”
Në mbështetje të nenit 100 të Kushtetutës dhe të nenit 4, të ligjit nr.10325, datë 23.9.2010, “Për bazat e të dhënave shtetërore”, me propozimin e ministrit të Drejtësisë, Këshilli i Ministrave
V E N D O S I:
I. Në vendimin nr.330, datë 22.4.2020, të Këshillit të Ministrave, bëhen këto shtesa:
1. Pas pikës 3 shtohet pika 3/1, me këtë përmbajtje:
“3/1. Të dhënat, që përmban “Sistemi i Deklarimit të Pasurisë dhe Konfliktit të Interesit –EACIDS”, mbrohen nëpërmjet një niveli sigurie që siguron enkriptimin e të dhënave që ruhen në të.”.
2. Në shkronjën “c”, të pikës 5, shtohet fjalia, me këtë përmbajtje:
“Personi i interesuar për aksesimin e sistemit elektronik dhe bazën e të dhënave EACIDS regjistrohet me llogari përdoruesi të posaçme dhe fjalëkalim, duke paraqitur saktë identitetin e tij me qëllim garantimin e sigurisë së informacionit.”.
II. Ngarkohet Inspektorati i Lartë i Deklarimit dhe Kontrollit të Pasurive dhe Konfliktit të Interesave për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU
***
V E N D I M
PËR
TRANSFERIMIN NË PRONËSI TË BASHKISË ROSKOVEC, PËR NJËSINË ADMINISTRATIVE KURJAN, TË PASURISË ME NUMËR 213, ZONA KADASTRALE 3805, DHE PËR NJË NDRYSHIM NË VENDIMIN NR.770, DATË 24.9.2010, TË KËSHILLIT TË MINISTRAVE
Në mbështetje të nenit 100 të Kushtetutës, të neneve 3, shkronja “ç”, dhe 5 e 8, të ligjit nr.8744, datë 22.2.2001, “Për transferimin e pronave të paluajtshme publike të shtetit në njësitë e qeverisjes vendore”, të ndryshuar, me propozimin e Kryeministrit, Këshilli i Ministrave
V E N D O S I:
1. Transferimin në pronësi të Bashkisë Roskovec, për njësinë administrative Kurjan, të pasurisë me numër 213, zona kadastrale 3805, sipas formularit dhe planit të rilevimit, që i bashkëlidhen këtij vendimi, me qëllim për t’u përdorur në fushën e zhvillimit ekonomik.
2. Pasuria e përcaktuar në pikën 1, të këtij vendimi, i shtohet listës së inventarit që i bashkëlidhet vendimit nr.770, datë 24.9.2010, të Këshillit të Ministrave, “Për miratimin e listës përfundimtare të pronave të paluajtshme publike, shtetërore, që transferohen në pronësi ose në përdorim të Bashkisë Roskovec, të Qarkut të Fierit”.
3. Bashkisë Roskovec i ndalohet ndryshimi i destinacionit dhe tjetërsimi i pasurisë së përcaktuar në pikën 1, të këtij vendimi.
4. Ngarkohen Bashkia Roskovec dhe Agjencia Shtetërore e Kadastrës për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
Në mungesë dhe me porosi
ZËVENDËSKRYEMINISTRI
BELINDA BALLUKU